Onorab Depite Garcia Delva Chape Anba Yon Tantativ Asasinay Nan Sen Mak

Nan apre midi vandredi 23 sektanm 2016 lan, Onorab Depite Garcia Delva, ki se tou Kandida pou pòs Senatè Depatman Latibonit anba banyè AAA, t al patisipe nan yon rankont travay Onorab Senatè Camille Cantave te òganize pou sipòte kandidati li.

 

Apre rankont sa a, gen yon gwoup atoufè sou moto ki t ap tann Onorab Depite a devan lokal Vision 9 nan zòn Chemin Neuf pou yo fè zak asasinay sou li. Yo vare sou Depite a ak tout manm ekip li epi kreye gwo latwoublay. Menm moman an, yo tonbe tire katouch devan dèyè. Gen yon katouch ki grafouyen figi Onorab Depite Garcia Delva epi gen 2 manm nan ekip li ki viktim anba bal atoufè sa yo. Yo chak pran yon bal nan pye.

 

Ekip Onorab Depite a te kouri mennen 2 viktim yo al pran laswenyay nan Lopital Sen Nikola ak Mibalè. Onorab Depite a li menm t al fè pansman nan lopital Pierre Payen. Pou kounye a, li lakay li sou kalman.

 

Onorab Depite Garcia Delva kondane ak tout fòs li tantativ zak asasinay sa a ki fèt pandan li nan mitan kanpay li. Li klè pou tout moun se te yon kou byen monte pou te touye l. Se grasa ak vijilans ekip li ak moun nan popilasyon an ki anpeche atoufè sa yo pat tou voye Onorab la nan peyi san chapo.

 

Anplis tou, nan menm jounen ayè a, ozanviwon 3h nan laprèmidi konsa, nan sant vil Sen Michel Latalay, Ti Moyiz (non jwèt li), senpatizan zele kandida pou pòs Senatè nan Latibonit anba banyè Platfòm Pitit Desalin, antre ak tout boulin sou yon kòtèj 120 moto ki t ap defile pou sipòte kandidati Onorab Garcia Delva. Grasa Dye, pa gen blese.

 

Onorab Depite Garcia Delva mande pou Komisè Gouvènman Sen Mak la idantifye bandi sa yo epi mete aksyon piblik an mouvman kont yo pou reponn kesyon sou zak tantativ asasinay yo fè sou yon Depite an fonksyon nan 50èm Lejislati a.

 

Onorab Depita Garcia Delva mande tout kandida, patizan oswa senpatizan Kandida ki pral patisipe nan eleskyon 9 oktòb yo pou depoze zam vyolans lan epi pran chimen biwo vòt pou fè revandikasyon yo pase. Se sèl konsa, n ap pèmèt bon jan demokrasi boujounen nan peyi a.

 

Onorab Depite a mande tout patizan ak senpatizan l nan Depatman Latibonit pou rete tèt frèt. Pa pran nan pwovokasyon. Pa rann mal pou mal. Randevou kase 9 oktòb 2016. Wè pa wè, yon sèl kout kle.

 

Pou tout enfòmasyon anplis sou tantativ asasinay sa ak lòt enfòmasyon sou kanpay Onorab Depite Garcia Delva, nou mèt kontakte Onorab Depite Myriam Amilcar, Kwodonatè Kanpay.

 

Laisser un commentaire

Votre adresse courriel ne sera pas publiée. Les champs obligatoires sont indiqués avec *